الظلم خيّم وليله طال
واسدل على النور دستوره
وهبت عواصف من الأهوال
صوت الشبابيك مذعوره
تنبي عن الوضع والأحوال
ومراية الدار مكسوره
الزُور سايد من الجهال
منشور بالصوت والصوره
كنت احسب إن فتنة الدجال
تطلع على ناس مخموره
وان شفت قراية الفنجال
قلت الزمن سابق عصوره
لين اصبح الوضع شبه خبال
وانتج لنا ناس مسعوره
تمشي على دقة الطبال
وتهدم تواريخ معموره
وان صحت يامعشر العقال
سمعت الأصوات مغموره
قلت السبب قالو الجوال
يلعب بنا لعبة الكوره
أما تداقش مع المنوال
وتعطل العقل عن دوره
والا أغلقو دونك الأقفال
خلك بدارك ي الإصطوره
وايقنت لو يطلع الدجال
في هالزمن شاف جمهوره
الشاعر / حامد بن براك
تعليقات
إرسال تعليق