الشوق

الشوق

ياذيب  انا وياك روس المنِيِفات
أجر صوتي وانت جاوبت  عاوي

تقنب قنيب مطوعين الصعيبات
والصدر من لوعات بقعا غناوي

مدري تواسيني على كل مافات
والا ياذيب انته للأحداث راوي

قلبي ربابه .. والضلوع النحيلات
أعزف بها حزن وفراق ورثاوي

ياليت لجروح الليالي مصدات
القلب شال من الهموم البلاوي

واكبر مصيبه من طعون القرابات
الخنجر المسموم ماله مداوي

يون قلبي طول ليله ولا بات
أونس بوسط الجوف ميسم وكاوي

ونَّت خلوج حوارها تو مامات
تقرع قريع وقلبها فيه شاوي

تحن من جوف الضلوع الصخيفات
وترفع ولدها تحسب الموت ياوي

ودموعها بالأرض سوَّت علامات
مثل المطر من داخل العين هاوي

قلبي يشاطرها الحزن والمتاهات
اثر الفراق أقوى السيوف الرهاوي

الله حسيب مروجين الاشاعات
والقاضي اللي مايحل الدعاوي

جف الحبر من زود ماشاف ماسات
وكتبت من دم الوريد البقاوي

الهم يطويني وأنا اطويه بسكات
ي قدرة الله ياحياة الشقاوي

آخر شطر فيما كتبته من ابيات
توقيع عاشق يوم طاح متساوي

الشوق يطوي كل ليل المسافات
لعيون ضبي الريم قلبي فداوي 

الشاعر /  حامد بن براك