أمن الطرق

1
بسم الولي خطيت حبرن بقرطاس
ونظمت قافي من كبار  المثايل

2
ولبَّست هامات المعاني بالالماس
وشبّيت من قدح المشاعر فتايل

3
وبيت القصيد ليا بنيته على ساس
تفنى البشر والبيت يبقى دلايل

4
 ويامرحبا ... تعداد ماهب نسناس
واعداد مايجري .. من المزن سايل

5
في حفل كسَّاب المدايح مع الناس
اللي على هامات الامجاد طايل

6
فعله مثابت كيف جلاي الأعماس
دون الخوي  لاقام  سوا هوايل

7
يروي كبودن من عنا الوقت يبّاس
وجاهه يذري من سموم القوايل

8
ابن سعيد .. اللي للجواد نبراس
عشر سنوات وزود حاز الفضايل

9
صالح مثل غيثن بهر كل عساس
باول طلوع الوسم والعشب مايل

10
من روس غامد حُطها بين الأقواس
قوم ٍ لهم  في    كل وقعه فعايل

11
فيهم صخر بن وادعه راوي الناس
روى حديث المصطفى بالخصايل

12
خيالة الحرداء  عما  كل  جساس
حاضر وماضي من طياب السلايل

13
وكل حموين له من القوم جلاس
ولاهي غريبه من عيال الحمايل

14
امن الطرق مجلاسهم ..  يرفع الراس
فازو  بفعل الطيب والشك زايل

15
حطي على ظهر المدرج ولا باس
الكبتن  الناجح  يجيله  بدايل

16
جانا الشعاع اللي قشع ظلمة  الياس
 يامرحبا ..  تعداد  وبل  المخايل 

17
بصدورنا ترحيب تعداد الأنفاس
و نون العيون من الكرامه جلايل

18
جانا ولد نايف حكيم وقوي باس
صيته مع العربان صايل وجايل

19
طارق  شبيه سهيل معني ومقياس
نجمٍ على كل المخاليق نايل

20
من لابت الهيلا  متعِّبْت الافراس
ذباحة الحايل عمى كل عايل

21
 اصغر ولد فينا للأخطار دواس
ومن الشموخ ينافس جبال حايل

  22
في ضلنا تنشا حكومات ورياس
حاضر  عتيبه .. والسنين  الأوايل

23
حنا خوال المصطفى شوش ياراس
ستر العذارا .. ناقضات الجدايل

24
وقّف ياهاجوسي ترى الوقت حساس
وادري عتيبه  ماتهاب الصمايل

25
وكل خوياي اجلهم قدر واحساس
ومكانهم بين الهدب يوم اخايل

26
لو المراجل تعطي الأول الكاس
امن الطرق تحكم ظهور الاصايل

27
 خص العطيف ان جيت ابا امدحهم احتاس
من وين ابا  ابدا .. غرقوني جمايل

28
والله لااجامل ولا اني ببلاس
على النقا طبعي ولابه تحايل

29
لاجيت ابا امدحهم ضرب شعري الماس
الضغط عالي ..  والقصايد قلايل

30
إشلع بنا فالجو ياطير قرناس
حنا مع النخوه نجيك انتهايل

31
تمت وصلو عد  ماغردت واس
وعداد مانذبح .. للجواد حايل
32
وعليه اصلي  كل مامر هوجاس
شفيعنا  يوم  الحشر  والهوايل

أمن الطرق
#حامد بن براك