قصيده مهداه من الشاعر حامد بن براك الى الشيخ فايز العجيب واخوانه وآل العجيب بمناسبة زواج الشيخ خالد العجيب
1
ياهاجسي .. ارقى على الغيم وإطلاه
بأجزل بيوت الوصف غط السحايب
2
جعل السحاب .. من الحجاز وقراياه
يمتد .. يالين الخليج وحلايب
3
ومع نوض براقه تراكم خلاياه
كن المزن والشيخ ولف وحبايب
4
واليا ارعد الرعاد .. ثم انتثر ماه
واصبح من علو السماء له صبايب
5
جاك المطر .. ينحت على الصخر ذكراه
ويخّلد إسمه .. طيب والا غصايب
6
ويصب وبل الغيث .. والمدح يبراه
من صيت إبو محمد .. غدا المزن ذايب
7
جتني .. ثعول المزن .. تشرح مزاياه
وفاح الخزاما .. مع نسيم الهبايب
8
تقول ساس الجود .. وأجمل حلاياه
شيخن يذرّي من سموم اللهايب
9
فايز .. و فايز والمدايح تغشاه
وقولت نِعم تزهاه حاضر وغايب
10
هو حاتم الهيلا .. وياحي طرياه
مدَّت يمينه تغني أقصى القرايب
11
يقضي ديون سنين بأصغر عطاياه
وأكبر عطا يافقر تحت النصايب
12
الشامخ اللي قمّة المجد مركاه
الراسي اللي نزبنه فالنوايب
13
يطيب فيه المدح .. ويزين معناه
راع الكرم ..صيته يفك النشايب
14
إسمه شهَر .. ووسط الدواوين نقراه
ينومس بفعله شبيبٍ وشايب
15
الحج .. سيّرله قوافل ويرعاه
يبغا الجزاء من عند راع الوهايب
16
ودعوة كبير السن .. لاقال يالله
وفرحة فقير ودمعة إنسان تايب
17
ماهي قليله عن ربي ورُحماه
ياجعل ابوه بجنة الخلد طايب
18
وتكريمه صقور الوطن .. مانسيناه
اللي على الحد الجنوبي رقايب
19
لبسهم وشاح الزعامه بيمناه
كنه يقول إني عن العود .. نايب
20
وأنار درب العلم .. والنور شفناه
وكوّن لجان وروّض الها الصعايب
21
المستحيل .. الشيخ فايز تحداه
والحلم يتحقق بعد كان غايب
22
واللي نوى يمشي .. على جرّت اخطاه
يتعب .. ويرجع بأول الدرب هايب
23
قلب الأسد .. محدن يسوي سواياه
له نضرتن حرّه .. وله راي صايب
24
لو أجمع بيوت الشعر ساعة إلقاه
وانخا بيوت المدح طيب وطلايب
25
والله .. ماتكتب عِشر من مزاياه
المدح نقطه في بحر من عجايب
26
ابيوت شعري .. في جنابه مبناه
وضلوع صدري .. كلبوها حطايب
27
وقندت له دله .. وصوف ومباهاه
ومديت فنجالٍ من الكيف رايب
28
يستاهل الفنجال .. ماهي مراواه
هذي حقيقه ماعليها شوايب
29
شيخن .. ليا منه تعنَّز بمركاه
يشبه لسلمان الحزم فالحرايب
30
وحقٍ .. علي أمدح بعد طيّب الجاه
مثل النخل .. ضل وشموخه ونجايب
31
من دون ربعه .. لاهب النار ياطاه
خرّج من عتيبه جنود وكتايب
32
فواز .. من كثر العرب يوم تنصاه
حطم رقم موسوعة أهل الحسايب
33
التاج والنجمه خذت من حلاياه
وهيبة شموخ سهيل بين الحدايب
34
ومبروك تعداد الرطب .. ساع مجناه
مبروك ياخالد .. زبون الصعايب
35
ي آل العجيب .. انتم دهاتن من دهاه
عون الرفيق .. وللمعادي عطايب
36
شِعري مختَّم .. والختم لاطبعناه
ختم العتيبي وِرث من راس شايب
37
ربعي حرارن فالجزيره مظراه
على العِدا ياهيه ساقو مصايب
38
سلايل الهيلا هل العز والجاه
ألآد السواط ... متعبّين الركايب
39
تمت .. وصلو عِد وبلن ذكرناه
بأغنى وصوف الحاتمي له صبابيب
40
على النبي .. شفيعنا يوم نلقاه
في ساعتن مابه خليل وقرايب
حامد بن براك
تعليقات
إرسال تعليق