جيت أعايد
بسم ربي مطلع القاف إستعنا
نرسم بيوت الشعر فن ومهاره
تخضع مزون القصايد لاوصلنا
والبروق تلوح غاره بعد غاره
لجل الآد طوار صاب الراس جِنا
شاش من زود الفخر طيب ونعاره
جيت اعايد وآتفاخر وآتغنا
عاد عيد الآبه اللي بالصداره
ربعي اللي فالمواقف ماتونا
من نخاهم قام حظِه من نهاره
وقتنا الحاضر ومن ماضي زمنا
نعتلي نجم الثريا في مداره
العوايد والسلوم وطبع أهلنا
ثابته رغم التقدم والحضاره
كيف مفخر والفخر فينا ومنا
فعل الآد طوار معروفن مِساره
بالتكاتف لو حمول اليوم طنا
مانشيل اهمومها ياهل الأَماره
كنها مثقال ذره في وطنا
والتحزب مايِعد من الشطاره
الجروح اليا تَغْطّت .. مابرنا
والمراهم ماتجي دون استشاره
الوكاد إنا على الله إتكلنا
العلاج يخالطه طعم المراره
صدر القانون يالرمح المطنا
الأساس أهم من شكل العَماره
الحِكم يقطع لهيب النار عنا
الفتيل اللي على راسه شراره
ويخزم اللي بالأقاويل إمتحنا
سد مارب طاح والأسباب فاره
لو رخيت عنانها خيل المثنا
يسمعون القدح سكان القراره
كيف لو سليت أنا السيف المحنا
نجدع براس الخميني وسط داره
نعطي الأشناب هيبه لافتلنا
ولا نصلي بالصفوف بلا طهاره
من تردى والله إنه ماشحنا
لاكن التاريخ ماسك له خفاره
لالعبت آجيبها كبوت صنا
الصقر تخضع لهيبته الحِباره
ولا نويت الجِد رد العلم عنا
العلم مرفوع من فوق المناره
ينطق التاريخ لامنا رحلنا
يبني أمجاد ويهد أمجاد تاره
يالله انك تبري القلب المعنا
وتجعل قلوب العرب رهن الأَشاره
تجتمع من دون شك ودون ضنا
عامره بالطيب من زود النِظاره
والختام الجذع للمختار حنا
وكل قافٍ ماتِطرق له خساره
الصلاه اللي على المبعوث منا
عِد مافالبحر من لول ومَحَاره
تعليقات
إرسال تعليق